திருவண்ணாமலை அருகே விடுதியில் தங்கியிருந்த 4 மாணவிகள் மற்றும் காப்பாளர் ஏரியில் மூழ்கி பலி
திருவண்ணாமலை அருகே விடுதியில் தங்கியிருந்த 4 மாணவிகள் மற்றும் காப்பாளர் ஏரியில் மூழ்கி பலி
திருவண்ணாமலை அடுத்த ஆணாய்பிறந்தான் கிராமத்தில் உள்ள அரசு உதவி பெறும் பெண் குழந்தைகள் பாதுகாப்பு மையத்தில், விடுதி காப்பாளர் தேன்மொழி மற்றும் நான்கு மாணவிகள் சமுத்திரம் ஏரியில் மூழ்கி உயிரிழந்தனர். தொழிலாளிகளின் எச்சரிக்கையை மீறி அவர்கள் ஏரியில் குளிக்க சென்றதே இந்த விபத்துக்கு காரணமாகும்.
திருவண்ணாமலை அடுத்த ஆணாய்பிறந்தான் கிராமத்தில், அரசு உதவி பெறும் பெண் குழந்தைகள் பாதுகாப்பு மையம் செயல்பட்டு வருகிறது. டி.டி.எச்., கோர் டிரஸ்ட் என்ற அமைப்புடன் இணைந்து இயங்கும் இந்த மையத்தில், தற்போது 46 மாணவிகள் தங்கி அரசு பள்ளிகளில் கல்வி பயின்று வருகின்றனர்.
இந்நிலையில், 34 மாணவிகள் தீபாவளி விடுமுறையை முன்னிட்டு சொந்த ஊர்களுக்கு சென்ற நிலையில், மையத்தில் 12 மாணவிகள் மட்டும் இருந்துள்ளனர். மதியம் 1:00 மணி அளவில், இந்த மையத்தை ஒட்டியுள்ள பின்புற சமுத்திரம் ஏரியில் குளிக்க செல்ல முடிவு செய்தனர்.
இதனிடையே, மையத்தின் சுற்றுச்சுவர் கட்டும் பணியில் ஈடுபட்டிருந்த தொழிலாளிகள், 'ஏரியில் குளிக்க வேண்டாம்' என மாணவிகள் மற்றும் விடுதி காப்பாளர் தேன்மொழி ஆகியோரை எச்சரித்தனர். இருப்பினும், அவர்கள் அந்த எச்சரிக்கையை மீறி ஏரியில் இறங்கினர்.
ஏரியில் குளிக்க சென்றபோது, சில மாணவிகள் சேற்றில் சிக்கி நீரில் மூழ்கினர். இதனை பார்த்து உடன் சென்ற மற்ற மாணவிகள் அலறி கூச்சலிட்டனர். விடுதி காப்பாளர் தேன்மொழி, மூழ்கிய மாணவிகளை காப்பாற்ற முயற்சித்தார்.
அதே நேரத்தில், ஏரியிலிருந்து தப்பித்து வந்த 7 மாணவிகள் பொதுமக்களிடம் உதவிக்கு அழைப்பு விடுத்தனர். ஆனால், அதற்குள் தேன்மொழி மற்றும் நான்கு மாணவிகள் என மொத்தம் ஐந்து பேர் நீரில் மூழ்கி உயிரிழந்தனர்.
இச்சம்பவத்தை அறிந்த சுற்றுச்சுவர் கட்டுமான தொழிலாளர்கள், ஏரியில் இறங்கி ஐந்து பேரின் சடலங்களையும் மீட்டெடுத்தனர். இந்த விபத்து குறித்து கலெக்டர் வந்தனா கார்க் நேரடியாக மையத்திற்கு சென்று விசாரணை நடத்தினார்.
திருவண்ணாமலை மேற்கு போலீஸார் வழக்கு பதிவு செய்து, இந்த விபத்து ஏன் நடந்தது என்பதற்கான காரணங்கள் மற்றும் பாதுகாப்பு நடவடிக்கைகள் குறித்து விசாரித்து வருகின்றனர்.
N.Prakash--MT
